Gumshem Myen hpyen hpung ni hpe KIA ni bawm hte hkap gasat
Mungmyit Sinli Ga (Kachin Sub-state), KIA Masat (4) Dap Ba, Masat (8) Dap Dung ginra, Nalwi hte Bangwa lapran kaw, August shata 20 ya jahpawt hkying 9:00am aten daram hta gumshem Myen hpyen hpung ni hpe KIA hpyen hpung ni bawm hte hkap gap gasat ai lam chye lu ai.
“Myen hpyen Hk.M.Y (324) dap na ni, yu wa ai (30) lung wa ai (30) dap galai kachyai galaw ai lam lapran e, anhte kaw na ni bawm hte hkap dem bun ai kaw Myen maga na marai 2 si, marai 4 gaw hkala nna htaw mat wa sai, anhte kaw na ni gaw hpa nra ai” nga nna lit nga salang langai tsun dan ai.
Dai ni shani ka-ang kaw nna, shana maga hkying 2:00pm aten daram du hkra, Segyi kaw nga ai, gumshem Myen hpyen dap ni kawn Namhkum mare maga de, sinat kaba hte (10) jan lang gap bun ai hta bawlung pa kaw pala si langai wa hkrat kapaw ai raitim, mare masha ni hta hkra hkala ai lam gaw nnga ai hpe chye lu ai.
August shata 19 ya shani hta mung, KIA Masat (4) Dap Ba, Masat (34) Dap Dung ginra, Mandung kaw dap jung shara jahkrat nga ai gumshem Myen hpyen Hk.L.Y (130) dap hpe KIA ni sa htim gap gasat ai lam nga ai.
Ndai zawn hpyen dap kaw sa htim gap ai lam gaw, Mandung de shang wa ai lam numshe shagu ngu na kaw gumshem Myen hpyen la ni lai wa lai sa mungshawa ni hpe laja lana sawk jep shatsang ai majaw, sa gap gasat ai lam rai na re, nga nna shawng lam na lit nga ai salang ni tsun ai kaw na chye lu ai.
