Gumshem Myen hpyen hpung ni hpe KIA ni hkap gap gasat

Sinpraw Ginwang Ginjaw, KIA Masat (3) Dap Ba, Masat (27) Dap Dung ginra, Mawswi mare hte Banghkung Yang mare Mawswi  hka mahkrai kaw, March shata 10 ya shani gumshem Myen hpyen hpung ni hpe KIA ni bawm hte hkap gap gasat ai lam chye lu ai.

Ndai gumshem Myen hpyen hpung ni gaw Loi Jau Bum hpyen dap de, hpyen lang arung arai hte malu masha wa sa ai hpung ni re lam chye lu ai.

KIA Masat (27) Dap Dung ginra hta sha, March shata 8 ya shani Munghkawng hpyen dap kaw nna, Maji Gung hpyen dap de lung wa ai gumshem Myen hpyen hpung ni hpe KIA ni Laika mare htum pa Hka la hka mahkrai kaw hkap gap gasat ai lam nga sai re.

Dai shani gap hkat ai kaw na hprawng bra taw nga ai gumshem Myen hpyen ni gaw, Madawng Bum kaw nkau mi, Laika mare hte Zupja lapran na madang shalawng kaw nkau mi rawng nga ai hpe KIA hpyen hpung ni sin hkap nga ai majaw, gasat gala gaw naw byin wa mai ai lam, ginra masha ni tsun ai kaw na chye lu ai.