Gumshem Myen hpyen hte Pyi Tu Tsit ni nga ai post hpe KIA ni sa htim gap gasat
KIA Masat (5) Dap Ba, Masat (3) Dap Dung ginra, Waimaw Wuyan kaw dap jung shara jahkrat nga ai, gumshem Myen hpyen hte Pyi Tu Tsit ni nga ai post hpe July shata 28 ya jahpawt hkying 2:00am aten kaw nna hkying 3:00am aten laman hta KIA hpyen hpung ni sa htim gap gasat ai lam chye lu ai.
Gasat gala majan byin ai hta hpyen wa maga na si hkala masha marai 10 daram lawm ai rai nna, hpyen lang arung ni zing la lu ai lam na chye lu ai.
Wuyan mare hta lai wa sai shani kaw nna Pyi Tu Tsit ni dap jung shara jahkrat nhtawm, lai wa lai sa mungshawa masha ni hpe sawk jep ai lam, gumhpraw hpyi shagyeng sha ai lam ni galaw ai re lam chye lu ai.
Gumshem Myen hpyen dap hte Shwi Min Pyi Tu Tsit ni pawng hpawm hpyen hpung ni July shata 10 ya shani kaw nna, KIA ni nga ai shara de hpyen shamu shamawt htu lung wa ai majaw gasat gala majan byin wa ai re hpe mung chye lu ai.
