Gumshem Myen hpyen la htaw ai modo (14) hpung ni hpe KIA ni bawm hte hkap shingla gasat
Mungmyit Sinli Ga, KIA Masat (6) Dap Ba, Masat (9) Dap Dung ginra, Nam Um mare lahta Kawnghka mare makau kaw, January shata 12 ya shani hkying 11:53am aten hta gumshem Myen hpyen modo (14) hpung ni hpe KIA ni bawm hte hkap shingla gasat dat ai lam chye lu ai.
“Gumshem Myen hpyen modo (14) hpung ni gaw, Muse (105) mile kawn, Kutkai maga lai yu wa ai hpe KIA ni hkap gap gasat dat ai lam nga ai, ndai modo hpung ni, Namhpakka Hk.L.Y (123) dap kaw du shang mat ai hpang hpru wa ai lam nnga shi ai” nga nna shawnglam na lit nga ai salang langai tsun ai.
Min Aung Hlaing woi awn ai gumshem Myen hpyen dap kaw nna, laknak lang rawt malan wuhpung ni hte 2023 ning January shata praw 1 kaw nna, December shata 31 ya shani du hkra, dinghkrai gap hkat jahkring ndau da ai raitim, hpyen shamu shamawt ai lam ding yang ngu na galaw ai sha n-ga, KIA hpyen dap hpe Jet Fighter nbungli hte bawm jahkrat bun ai lam galaw nga ai re.
Nationwide Ceasefire Agreement (NCA) lakmat htu da ai, Kayin Mung hte Hkang Mung ginra ni hta mung, ndai laman hta gumshem Myen hpyen dap gaw, Jet nbungli hte bawm jahkrat bun ai lam galaw nga ai hpe mu chye lu ai.
