Gumshem Myen hpyen la ni kawn mungshawa dum n-ta hkan shang sawk nna arung arai ni mya la
Mungmyit Sinli Ga (Kachin Sub-state) ginra hta hpyen shamu shamawt hkawm nga ai Gumshem Myen hpyen dap ni kawn Munggu Ginwang, Hpai Kawng mare hte Kawng Sahti mare na mungshawa ni a dum n-ta hkan shang sawk nna, shanhte ra ai arung arai ni mya la kau ya ai lam, ginra masha ni tsun ai kaw na chye lu ai.
“September shata (20) ya shana maga Hpai Kawng mare hte Kawng Sahti mare na mungshawa dum n-ta (3) kaw n-ta madu ni nnga taw ai ten Myen hpyen la ni kam ai hku shang sawk nna, shanhte ra ai arung arai ni mya la kau ya ai, U ni du hkra lawm ai” nga nna dai ginra na mungshawa ni tsun ai.
Arung arai mya la hkrum ai dum n-ta ni gaw, Wunpawng amyusha dum n-ta rai nna, dai ginra mayan hta amyusha hpan hkum shanu shingbyi nga ai ginra re lam chye lu ai.
Munggu Ginwang kata na mungshawa ni hpe Gumshem Myen hpyen dap kawn lai wa sai bat hta ahkang nlu ai shinggan nmai pru ai lam, pru ai raiyang gap na ngu tsun jahkrit da ai lam nga ai re hpe chye lu ai.
Ya aten Mungmyit Sinli Ga ginra shara shagu hta Gumshem Myen hpyen dap kawn ladat amyu myu hte Myen hpyen la hte hpyen arung arai htaw shalai ai lam galaw nga ai sha n-ga, hpyen shamu shamawt htu shadut ai lam dingyang galaw nga ai majaw, KIA, MNDAA ni hte Gumshem Myen hpyen dap ni gasat poi jahkring hkring byin nga ai re.
