Gumshem Myen hpyen modo (30) hpung ni hpe KIA, PDF pawng hpyen hpung ni hkap gap gasat
KIA Masat (8) Dap Ba ginra, Mawlu Mawhan lawu kaw gumshem Myen hpyen modo (30) hpung ni hpe, March shata praw 3 ya dai hpawt hkying 9:00am aten daram hta KIA, PDF pawng hpawm hpyen hpung ni hkap gap gasat dat ai lam chye lu ai.
Gumshem Myen hpyen modo (30) hpung ni gaw, lawu ga de na Jinghpaw mung de hpyen n gun hte hpyen lang arung arai htaw let htu lung wa ai majaw, KIA, PDF pawng hpawm hpyen hpung ni hkap gap gasat ai re lam chye lu ai.
Lai wa sai January shata 27 ya shani hta mung, gumshem Myen hpyen modo (34) hpung ni hpe KIA, PDF pawng hpawm hpyen hpung ni, Pin Tin Mare lawu kaw kalang, dai hpang Pin We hte Pin Tin lapran kaw modo (40) hpung ni hpe bai hkap gap gasat ai lam nga ai.
Gumshem Myen hpyen ni ya na zawn hpyen n gun jat ai lam ding yang ngu na nga ai majaw, KIA Masat (1) Dap Ba, Masat (2) Dap Ba, Masat (8) Dap Ba, Masat (9) Dap Ba hte Sagaing ginra ni hta chyahkring hkring gasat gala majan byin nga ai re.
