Gumshem Myen hpyen Modo (38) hpung ni hpe KIA ni hkap gap gasat

KIA Masat (2) Dap Ba, Masat (20) Dap Dung ginra hta, October shata (11) ya jahpawt hkying 9:10am aten Hk.L.Y (298) dap kawn hpyen shamu shamawt yu wa ai Gumshem Myen hpyen Modo (38) hpung ni hpe hkying 9:30am aten Hkum Tsai Yang lup wa kawng mayan kaw KIA hpyen hpung ni hkap gap ai kawn gasat gala majan byin ai lam chye lu ai.

Dai Gumshem Myen hpyen hpung ni hpe sha, hkying 10:05am aten hta, Lawa mare hkran, Sai Ling Hka makau kaw KIA hpyen hpung ni bawm hte hkap gap gasat ai lam nga ai sha n-ga, hkying 10:15am aten hta mung, Kawa Pang mayan hta bawm hte hkap gap ai kawn gasat gala majan byin ai lam, ya aten Gumshem Myen hpyen dap ni Kawa Pang mayan hta sinat kaji kaba gap shadam nga ai lam, shawng lam na lit nga ai salang ni shana wa ai kaw na chye lu ai.

Ya aten KIA Masat (2) Dap Ba ginra de Gumshem Myen hpyen dap ni hpyen shamu shamawt ai lam dingyang naw galaw nga ai majaw, KIA hte Gumshem Myen hpyen hpung ni shani shagu ngu na gasat gala majan jahkring hkring byin nga ai re.

KIA Masat (9) Dap Ba, Masat (6) Dap Dung ginra hta mung, Hk.M.Y (111) dap na Gumshem Myen hpyen hpung ni, hpyen shamu shamawt hkawm nga ai sha n-ga, October shata (11) ya jahpawt hkying 11:00am aten hta, Mu Nyin kaw nna Na Mawn maga de Gumshem Myen hpyen n-gun (100) daram hpyen shamu shamawt lung wa ai lam, shawng lam shisawk ni kaw na chye lu ai.