Gumshem Myen hpyen Modo hpe KIA ni bawm hte hkap gap gasat
KIA Masat (2) Dap Ba, Masat (45) Dap Dung ginra de hpyen shamu shamawt lung wa ai Gumshem Myen hpyen Modo langai hpe September shata 16 ya shani hkying 12:30pm aten daram hta, Panep Hka hte Kun Shwi Hka lapran kaw KIA hpyen hpung ni bawm hte hkap gap gasat ai re lam chye lu ai.
Gumshem Myen hpyen hpung ni gaw, Danai kaw nna KIA ni nga ai ginra de hpyen shamu shamawt htu shadut lung wa ai majaw, KIA hpyen hpung ni hkap shingla gasat ai lam, dai ginra na lit nga ai salang langai tsun ai.
September shata 15 ya jahpawt, hkying 6:00am aten daram hta mung, KIA Masat (45) Dap Dung ginra, Sumbwi Yang Ginwang, Tahkyet hte Tarung lapran shamu shamawt hkawm nga ai Gumshem Myen hpyen hpung ni hpe KIA hpyen hpung ni bawm hte hkap shingla gasat ai lam nga ai.
September shata 15 ya shana hta sha, hkying 9:45pm aten daram kaw nna hkying 10:00pm aten laman hta Gumshem Myen hpyen dap kawn Ginjaw Ginra makau grup yin re nga ai Law Hkum Bum, Mai Sak Pa hte Kumba Yang maga de sinat laknak kaba hkrup mara gap bun ai lam chye lu ai.
