Gumshem Myen hpyen modo hpung ni hpe KIA hte PDF pawng hpawm hpyen hpung ni hkap gap gasat
KIA Masat (8) Dap Ba, Masat (35) Dap Dung ginra, Monyin hte Namma lapran Nyaung Kung kaw, March shata praw 7 ya jahpawt hkying 7:00am aten daram hta gumshem Myen hpyen modo hpung ni hpe KIA hte PDF pawng hpawm hpyen hpung ni hkap gap gasat ai lam chye lu ai.
Gumshem Myen hpyen modo (27) hpung ni gaw, Monyin maga na hpyen n gun hte hpyen lang arung arai htaw nna lung wa ai kaw KIA, PDF pawng hpawm hpyen hpung ni hkap gap gasat dat ai kawn gasat poi byin ai lam chye lu ai.
Gasat poi byin nga ai aten hta Monyin kaw dap jung ai gumshem Myen hpyen ni sinat kaba hkrup mara gap bun ai majaw, ginra masha ni hkrit tsang nna hprawng yen nga ai lam, buga masha ni kaw na chye lu ai.
March shata praw 6 ya shani hta mung, KIA Masat (3) Dap Ba, Masat (27) Dap Dung ginra, Munghkawng mare makau na gumshem Myen hpyen dap hta hpyen n gun (100) jan du shang nga ai majaw, majan byin wa na hpe dai ginra na mungshawa ni hkrit tsang nga ma ai lam, ginra masha ni tsun ai kaw na chye lu ai.
