Gumshem Myen hpyen modo hpung ni hpe KIA ni hkap gap gasat
KIA Masat (5) Dap Ba, Masat (3) Dap Dung ginra, Zup Ra mare hte Numli Hka mahkrai pawt kaw, January shata praw 8 ya jahpawt hkying 7:40am aten hta gumshem Myen hpyen modo hpung ni hpe KIA hkap gap gasat ai lam chye lu ai.
Ndai gumshem Myen hpyen modo (19) hpung ni gaw, January shata praw 6 ya shani Myitkyina maga kawn Chi-hpwi maga de hpyen lang arung arai malu masha ni wa sa nhtawm bai nhtang yu wa ai hpe gap gap gasat ai re hpe chye lu ai.
Gasat gala majan byin ai hte Wakkak Bum kaw nga ai gumshem Myen hpyen ni laknak kaba hkrup mara gap bun ai hta Zup Ra mare kaw laknak kaba si wa hkrat kapaw ai lam nga ai raitim, mare masha ni kaw hkra hkala ai lam nnga ai hpe chye lu ai.
January shata praw 6 ya shana daw hkying 3:00pm aten hta mung, ndai gumshem Myen modo hpung ni hpe, KIA Masat (3) hpyen hpung ni Num Maw Yang mare makau kaw bom hte hkap gap gasat ai lam mung nga ai re.
KIA Masat (3) Dap Ba, Masat (15) Dap Dung ginra hta mung, KIA ni shara la nga ai, Lung Ja Bum maga de January shata praw 7 ya shani hta Nmawk gumshem Myen dap, Manmaw gumshem Myen dap ni kaw nna, laknak kaba 10 jan lang gap bun ai lam, ginra shisawk ni shana wa ai kaw na chye lu ai.
