Gumshem Myen hpyen modo hpung ni hpe KIA ni hkap gasat
KIA Masat (8) Dap Ba, Masat (35) Dap Dung ginra de hpyen shamu shamawt lung wa ai, gumshem Myen hpyen modo (33) hpung ni hpe December shata praw 4 ya jahpawt hkying 10:30am aten hta KIA ni Pinwe hte Mawlu lapran kaw hkap gap gasat ai lam chye lu ai.
Gumshem Myen hpyen ni gaw, KIA ni nga ai shara de hpyen n gun, malu masha hte hpyen lang arung arai htaw modo hpung ni hpe hkap gap gasat ai hta gumshem Myen hpyen maga na si hkala ai lam nga ai raitim, gade si hkala ai hpe gaw tup hkrak n chye lu shi ai lam, lit nga ai salang ni kawn chye lu ai.
December shata praw 3 ya jahpawt hkying 7:00am aten daram hta mung KIA Masat (8) Dap Ba ginra de gumshem Myen hpyen ni shamu shamawt shang wa ai majaw, KIA hte mungshawa makawp maga hpyen hpung PDF pawng hpawm hpyen hpung ni, Papawng mare makau kaw gasat poi byin ai re.
Gasat poi byin ai hta gumshem Myen hpyen ni Papawng mare de sinat kaba gap bang ai majaw, mare masha langai pala hkyep hkra hkala nna si sum mat ai lam na chye lu ai.
Mungmyit Sinli Ga (Kachin Sub-state), KIA Masat (6) Dap Ba, Masat (36) Dap Dung ginra rai nga ai, Man Yang, Hpawng Seng akyu hpyi Bum, Loi Ngu Bum, Sin Sai Htang hte Loi Wing Bum maga de, Munggu Bruha kawng, Hpawng Seng hpyen dap hte Kokang maga dap jung nga ai gumshem Myen hpyen ni kaw nna, laknak ni hte shani shagu ngu na 20, 30 lang gap bun ai lam, shawng lam na lit nga ai salang ni shana wa ai kaw na chye lu ai.
December shata praw 4 ya dai na maga hkying 6:45pm aten daram hta gumshem Myen hpyen nbung li Helicopter langai hte Bang Lum Bum, Loi Wing Bum, Loi Ngu Bum, Hpawng Seng akyu hpyi Bum hte Ta Dwi mare ntsa hkan hkying hkum mi daram wa pyen gayin nna bai nhtang yu mat wa sai lam, salang wa matut tsun ai.
Ya aten hta KIA Masat (6) Dap Ba ginra hta gumshem Myen Hpyen Dap, Dapnu (77), Dapnu (99), Ts.K.Hk (2), Ts.K.Hk (12), Ts.K.Hk (16) hte Ts.K.Hk (17) kata na hpyen n gun hkying 2,000 daram htu da ai lam, ginra shi sawk ni kaw na chye lu ai.
