Gumshem Myen hpyen ni Back-hoe ni hpe rim zing nna, gat seng ni hpe wan nat jahten kau ya
KIA Masat (2) Dap Ba, Masat (14) Dap Dung ginra, Hugawng Ginwang hta January shata 15 ya shani, Back-hoe ni hpe rim zing nga ai rai nna, ja maw kata na gat seng ni hpe wan nat jahten kau ya ai lam ni galaw nga ai hpe chye lu ai.
Lapu Hka ja maw kaw du nga ai Dainai (D.K.Ts) dap na hpyen n-gun (150) daram hpyen hpung ni gaw, ja htu lau ban ni a Back-hoe (7) hpe rin zing la kau ya ai rai nna, ja maw kata nga ai gat seng ni hpe wan nat jahten kau ya ai re lam, lit nga ai salang ni kaw na chye lu ai.
Ndai hpyen hpung ni gaw ya ten Mai Hkun Post kaw du nga ai rai nna, Woi Law ja maw kaw nga ai gat seng (10) hte Lapu Hka ja maw na gat seng (5) hpe wan nat jahten kau ya nhtawm, jak li (14) hpe mung rim zing da ya ai re lam chye lu ai.
Ndai zawn galaw ai lam gaw January shata 14 ya shani kawn, galaw hpang wa ai rai nna, gumshem Myen hpyen wa a matsun hte galaw ai re lam chye lu ai.
Gumshem Myen hpyen dap ni ya na zawn galaw nga ai sha n-ga, KIA Masat (9) Dap Ba, Masat (6) Dap Dung ginra hta mungJanuary shata 15 ya shani, laknak kaba gap shadam bun ai re hpe chye lu ai.
