Gumshem Myen hpyen ni bawm laknak kaba gap bun ai majaw, mungshawa marai 29 asak sisum nna, marai 57 hkala hkrum
Gumshem Myen hpyen ni bawm laknak kaba gap bun ai majaw, October shata praw 9 ya shana hkying 11:23pm aten daram hta Laiza Muklum Munglai Hkyet hpyen yen dabang kaw wa hkrat kapaw ai majaw, mungshawa marai 29 asak si sum nna, marai 57 hkala hkrum ai lam chye lu ai.
Asak si sum mat ai hta jawngma marai 10 lawm ai re. Hkala hkrum ai marai 57 hta na nkau mi gaw tsi rung na yu sai rai nna, nkau mi gaw Laiza mungshawa tsi rung kaw matut tsi tsi hkamla nga ai lam chye lu ai.
Asak si sum mat sai hkumtsawp moimang ni hpe dai ni October shata praw 10 ya shani hkying 2:00am aten hta Laiza mungshawa tsi wang kaw akyuhpyi hpawng galaw nhtawm, Laiza lupding lupwa de makoi mayang ai hpe galaw sai re.
Ndai zawn yawn hkyen hkrum ai majaw, Wunpawng Mungdan Amyusha Dawnghkawn hpe ka-ang hkum shayu nna, amyusha ting yawn hkyen hkum ai masat kumla galaw ai hpe chye lu ai.
Bawm laknak kaba wa hkrat kapaw ai makau grup yin shara hkan na dum nta ni yawng ngu na hten ayai mat ai sha n-ga, dai makau kaw tawn da ai jak arung arai modo, cycle ni mung hten mat ai hpe mu chye lu ai.
