Gumshem Myen hpyen ni gap shadam dat ai sinat kaba si mare kaw wa hkrat kapaw ai majaw, mung masha marai langai hkra hkala
Mungmyit Sinli Ga (Kachin Sub-state), KIA Masat (6) Dap Ba, Masat (36) Dap Dung ginra, Munggu Byuhar Kawng kaw dung ai gumshem Myen hpyen ni, December shata 18 ya shani gap dat ai sinat kaba pala si, Munggu mare shinggan Hpaumaw mare ningnan kaw wa hkrat kapaw ai majaw, mung mare masha Wunpawng hpawmi num langai pala si hkyep hkra hkala ai lam, ginra shi sawk ni shana wa ai kaw na chye lu ai.
Hkala hkrum ai hpawmi wa gaw Jan. Dawshi Nang Doi asak 35 ning rai nna, kan kaw pala hkrep hkra ai raitim grai wa tsang ra hkra gaw nre ai, ya ten Munggu mungshawa tsi rung kaw tsi tsi hkam la nga ai lam, lit nga ai salang langai tsun dan ai.
Jan. Dawshi Nang Doi gaw Dima mare de num wa ai rai nna, Munggu Hpaumaw mare mayu nta de wa gan nga ai aten hta ya na zawn hkala hkrum ai re lam, salang wa matut tsun ai.
December shata 19 ya dai hpawt hkying 10:30am aten hte shani ka-ang hkying 12:30pm aten daram hta mung, Munggu Hpawng Seng ginra, Loi Ngu Bum, Lashap Mare hte Man Yang makau grup yin hkan, gumshem Myen hpyen ni Jet Figther nbung li 2 hte bawm wa jahkrat bun ai sha n ga, sinat kaba ni mung ding yang naw gap shadam bun nga ai lam, shawng lam na lit nga ai salang ni shana wa ai.
KIA Masat (6) Dap Ba, Masat (36) Munggu Hpawng Seng ginra ni hta Kokang MNDAA ni nga ai de, gumshem Myen hpyen ni hpyen n gun law law hte htu shadut shang wa ai majaw shani shagu ngu na gasat poi byin nga ai re.
Jinghpaw mung hte Mungmyit Sinli Ga (Kachin Sub-state) ginra ni de, hka lam hkarang lam hku nna, gumshem Myen hpyen ni masha n gun, laknak n gun, malu masha hte hpyen lang arung arai ni htaw bang nga ai sha n ga, mungkan majan kaw jai lang ai hpyen gasat nbungli bawm jahkrat bun ai lam, laknak kaba ni hte gap bun ai lam galaw nga ai re hpe chye lu ai.
