Gumshem Myen hpyen ni hkam tawn ai bawm gabye kapaw la nna, mung mare masha langai hkala, langai asak si sum
Mungmyit Sinli Ga (Kachin Sub-state), Mugu Ginwang, Loi Kang mare na mung mare masha (2) gaw, gat simaw simai tam hkawm ai kaw October praw (7) ya shana maga 5:30pm aten, Gumshem Myen hpyen ni hkam tawn ai bawm gabye kapaw la ai majaw, Salang Lagwi Ting Hkaw hkala hkrum nna, Hpawmi Mading Dau Naw asak si sum mat ai lam chye lu ai.
Asak (58) ning re ai Hpawmi Mading Dau Naw gaw ningma sawng ai majaw, dai shara kaw nan asak si sum mat ai rai nna, Salang Lagwi Ting Hkaw asak (38) ning gaw, Baw hte lata hkan hkra hkala la ai lam chye lu ai.
Shan yan gaw rau mare shada rai nna, gat dut na matu nam de gat rai (simaw simai) tam hkawm ai ten, Bang Lum bum kaw Gumshem Myen hpyen ni hkam tawn ai bawm gabye kapaw la ai re lam, dai ginra na salang langai tsun ai.
Loi Kang mare hta dum n-ta htingaw (10) jan daram nga ai raitim, hpyen masa shuk shanut ai majaw, dai mare na mung masha ni gaw, Muklum kaba de shanu shingbyi nhtawm, Loi Kang mare de galaw lu galaw sha let wa nga ai re lam, matut chye lu ai.
