Gumshem Myen hpyen ni hpaw ai Man Je lahta tsang jawng hta jawngma langai kaw gumhpraw hkying 3000 a lahta bang na matu laika sumbu jaw
Gumshem Myen hpyen ni hpaw ai Man Je lahta tsang jawng hta jawng lung ai jawngma yawng hpe February shata 11 ya shani hta sara/num ni kaw nna, jawngma langai hkying 3000 a lahta bang sa wa ra na ngu laika sumbu jaw dat ai lam chye lu ai.
“Laika sumbu hta jawngma mying, Kanu Kawa mying hte gara lawk kaw nga ai ni ka nhtawm, gumhpraw hpyi ai lawng lam hte seng nna laika pa mung lawm wa ai hta, Man Je lahta tsang jawng a matu hpaji dap kawn hkasan jak langai jaw na re. Dai majaw jak tawn na shara, hka pipe, myihprap wan hte kaga ra mara yawng gaw lahta tsang jawng kaw na lajang ya ra ai majaw, jawng akyu ara hpung ni sara/num komiti malawm ni hte jawngma Kanu Kawa ni mung dang di ai daram alu gumhpraw jaw bang ya na matu, nga nna ka da ma ai” lam, Man Je ginra na salang langai tsun ai.
Jawngma langai hkying 3000 a lahta bang sa wa na ngu sara/num ni htet dat ma ai da, gumhpraw tam mung yak COVID a majaw gat rai manu ni mung rawt nkau mi gaw simai mari sha na gumhpraw pyi nlu grai yak nga ma ai, lai sai aten na asuya ni gaw ga baw shatut nna jawngma ni kaw hpa gumhpraw mung nhta ma ai, galaw ra ai lam nga yang jawng hte seng ai gumhpraw hte she galaw ai, ya na hpyen asuya wa gaw ga baw shatut nna hta hpang wa sai rai nga ai, nga nna salang wa matut tsun ai.
Man Je Myu kata hta lahta tsang jawng langai, lapran tsang jawng lahkawng hte lawu tsang jawng manga nga ai hta ga baw shatut nna, gumhpraw hta ai gaw lahta tsang jawng kaw sha naw rai nna, nta langai kaw jawngma marai gade nga yang gade na matu bang ra ai lam chye lu ai.
Man Je lahta tsang jawng hta lung nga ai jawngma yawng marai 800 jan lung nga ai rai nna, 2021 ning November shata praw 1 ya shani kaw nna jawng lung hpang ai re hte lai sai ten na asuya hta gaw jawng lung ai jawngma yawng marai 1000 jan lung ai re hpe mung chye lu ai.
