EEDY NEWS News and Development
KIA Masat (3) Dap Ba, Masat (15) Dap Dung ginra, Manmaw Nmawk, Nawngpau mare lam numshe kaw November shata 11 ya shani hkying 11:00am hta gumshem Myen hpyen hpung ni hpe KIA bawm hte hkap shingla gasat ai lam chye lu ai.
Gumshem Myen hpyen ni bawm kapaw hkrum ai hpang, hkying hkum mi jan hkra sinat kaji kaba hkrup mara gap shadam ai majaw, Nmawk Hkanan lawk kaw sinat kaba si wa hkrat kapaw ai majaw, mungshawa La kasha asak 23 ning re langai lagaw kaw hkra hkala nna, Manmaw tsi rung de tsi tsi na matu htaw yu wa sai, mungshawa nta 2 hpe mung gumshem Myen hpyen ni wan nat kau da ya ai lam, ginra masha ni tsun ai.
October shata 29 ya shani hta mung, gumshem Myen hpyen ni laknak kaba hkrup mara gap shadam ai majaw, Nmawk Hkanan lawk kaw wa hkrat kapaw nna mungmasha marai 2 hkala hkrum lai wa sai re.
Gumshem Myen hpyen dap ni lai wa sai, October shata 22 ya shani kaw nna KIA Masat (15) Dap Dung ginra de hpyen n gun tsa kaba hte htim gasat lung wa ai hta nbungli ni mung jai lang nga ai hpe chye lu ai.
Myitkyina kaw nna gumshem Myen hpyen la htaw ai Tungfung modo 2 hpe, November shata praw 10 ya shana maga hkying 7:25pm aten hta Law Sa hte Sani Hku lapran kaw KIA ni bawm hkap kapaw bun ai lam nga ai.
Ndai gumshem Myen hpyen ni gaw, KIA Masat (5) Dap Ba, Masat (3) Dap Dung ginra de shamu shamawt htu lung wa ai majaw, KIA ni hkap gap gasat ai re lam, shawng lam na lit nga ai salang ni kaw na chye lu ai.
