Gumshem Myen hpyen ni hpe KIA ni hkap gap gasat

Mungmyit Sinli Ga (Kachin Sub-state), KIA Masat (6) Dap Ba, Masat (9) Dap Dung ginra, Hkumung Kawng Ra mare kaw July shata 16 ya shana daw hkying 6:30pm aten daram hta gumshem Myen hpyen ni hpe KIA hkap gap gasat ai lam, ginra masha ni kaw na chye lu ai.

Ndai gumshem Myen hpyen dap, Dapnu (99) kata na hpyen hpung ni gaw, Hkumung Kawng Ra mare mayan hkan galoi mung, shamu shamawt chyinglau hkawm ai hpyen hpung ni re lam, ginra masha ni tsun ai re.

KIA ni hkap gap gasat ai hpang, Namhpakka kaw dap jung ai gumshem Myen hpyen dap, Hk.L.Y (123) dap ni laknak kaba hte hkrup mara gap shadam nga ai lam chye lu ai.

Ginjaw ginra, Manmaw Myitkyina modo lam Lailum Awng Ja kaw dap jung nga ai gumshem Myen hpyen dap hte Madi Yang maga de mung, July shata 16 ya shana hkying 6:10pm aten daram kaw nna, KIA ni sinat kaba hte gap gasat ai lam, shawng lam na lit nga ai salang ni kaw na chye lu ai.