Gumshem Myen hpyen ni hpe KIA ni sinat kaba hte sa gap gasat
KIA Masat (9) Dap Ba, Masat (44) Dap Dung ginra hta May shata 15 ya shana gumshem Myen hpyen dap de KIA ni sinat kaba hte sa gap ai kawn gasat gala majan byin ai lam chye lu ai.
Hpakant lam Nam Ya mare kaw nga ai Hk.M.Y (120) dap hpe KIA ni sinat kaba hte sa htim gap ai hta gumshem Myen hpyen maga na Du kaba madang re ai langai mi si mat nna, hkala ai masha marai kade re hpe atsawm nchye lu shi ai lam, ginra masha ni tsun ai kaw na chye lu ai.
May shata 16 ya dai ni mung, gumshem Myen hpyen modo (15) hte hpyen la hpring hpring htaw nhtawm, Manmaw maga na KIA Masat (5) Dap Ba ginra, Daw Hpum maga de lai lung wa sai lam, ginra shi sawk ni kaw na chye lu ai.
