Gumshem Myen hpyen ni hte KIA ni gasat gala majan byin
Mungmyit Sinli Ga (Kachin Sub-state), KIA Masat(4) Dap Ba, Masat (8) Dap Dung ginra hte Masat (6) Dap Ba, Masat (9) Dap Dung ginra, Nawng Swi Mare makau kaw February shata 28 ya jahpawt hkying 9:47am aten kawn hkying 10:00am aten du hkra, gumshem Myen hpyen dap hte KIA ni gasat gala majan byin ai lam chye lu ai.
Gumshem Myen hpyen dap n-gun (50) daram gaw, Nawng Swi Mare kaw na lagaw lam hte rawt wa ai hpe KIA pawng hpawm hpyen hpung ni, Nawng Swi Mare ntsa kaw hkap gap gasat ai kawn gasat poi byin ai re lam, shawng lam shiga lawk kaw na chye lu ai.
Gasat poi byin ai shara de, Kutkai Asiaworld Gate kaw nga ai gumshem Myen hpyen ni, sinat kaba 2 lang gap bun ai. Dai hpang hkying 10:30am aten kaw nna 1:10pm aten laman hta mung, Kutkai Byuha Kawng kaw na sinat kaba 120mm hte 5 lang gap bun nhtawm, shani ka-ang hkying12:38pm aten hta Kutkai Nin Si Kung kawn sinat kaba 6 lang gap bun ai. Matut nna hkying 12:51pm aten kaw na hkying 1:06pm aten du hkra, Kutkai TV Kawng kaw nna mung sinat kaba 5 lang gap bun ai.
KIA Masat (6) Dap Ba ginra, Kutkai maga na mungshawa modo 1 hte rawt wa ai gumshem Myem hpyen HK.M.Y (577) dap na n-gun (20) daram hte mung KIA ni Nam Tun Hkaraw kaw gasat poi byin ai lam chye lu ai.
KIA Masat (2) Dap Ba ginra hta mung, February shata 28 ya shana maga hkying 2:50pm aten hta Male Mare kaw nna rawt wa ai gumshem Myen hpyen HK.M.Y (381) dap ni hpe Mali Sut Yang lahta kaw KIA ni bawm hte hkap gap gasat dat ai re.
KIA ni bawm hte hkap gap gasat dat ai hpang, gumshem Myen hpyen dap ni makau grup gra de sinat gap dumbre shangoi ai lam chye lu ai. Mu Gawng hka mazup maga na rap wa ai gumshem Myen hpyen HK.M.Y (381) dap ni hpe mung, Nga pauk Tawng Hpunggyi Jawng shawng kaw February shata 28 ya shana hkying 6:00pm aten hta KIA ni, sinat kaba hte sa gap bum ai lam chye lu ai.
