Gumshem Myen hpyen ni hte KIA ni gasat gala majan byin
KIA Masat (1) Dap Ba, Masat (10) Dap Dung ginra, Mai Htawng mare makau kaw, March shata 15 ya jahpawt hkying 9:00am aten hta gumshem Myen hpyen hpung ni hte KIA ni gasat gala majan byin ai lam chye lu ai.
Dap mying n chye lu shi ai gumshem Myen hpyen n gun 80 daram gaw, Sumpra Bum lam Mai Htawng mare hku lai yu wa ai kaw KIA ni hkap shingla gasat dat ai kawn gasat poi byin wa ai re lam, lit nga ai salang ni kaw na chye lu ai.
Hkying 10:00am aten daram hta mung, KIA Masat (22) Dap Nawng Dap Dung ginra, Sup Hka maga de na, gale pru wa ai gumshem Myen hpyen hpung hte KIA ni gasat poi byin ai, dai hpang dai na maga hkying 2:00pm aten hta mung, Daru Yang maga na lung wa ai gumshem Myen hpyen ni hte KIA ni gasat poi matut byin ai re.
KIA Masat (3) Dap Ba, Masat (27) Dap Dung ginra hta mung, March shata 13 ya jahpawt hkying 9:00am aten daram hta Maji Gung kaba maga na yu wa ai, gumshem Myen hpyen n gun 300 daram hpung ni hpe, Mai Hkawng Pang Sak makau kaw KIA ni bawm hte hkap shingla gasat dat ai re lam, shawng lam na lit nga ai salang ni shana wa ai kaw na chye lu ai.
