Gumshem Myen hpyen ni hte KIA ni gasat gala majan byin matut byin
Mungmyit Sinli Ga (Kachin Sub-state), Munggu Ginwang KIA Masat (6) Dap Ba, Masat (36) Dap Dung ginra de, shamu shamawt chying lau shang wa ai gumshem Myen hpyen n gun 100 daram hte KIA ni, February shata 20 ya shani gasat gala majan byin ai lam chye lu ai.
“Myen hpyen dap gaw, Dapnu (99) ngu gaw maram ai, Mungbaw de na nkau, Muse 105 mile de na nkau hpung lahkawng pawng yang 100 daram rai na re. Banghka makau Te Nam Kawng kaw anhte kaw na ni hte gasat poi byin ai. Aten gaw hkying 1:13pm kaw na hkying 1:32pm aten du hkra re” nga nna lit nga ai salang langai tsun dan ai.
Myen hpyen ni shamu shamawt ai hta hkan nna, gasat poi gaw naw mai byin wa na re. (36) Dap Dung ginra, Munggu de shang ai hpyen modo 13 rai sai lam, salang wa matut tsun ai.
Ya aten KIA Masat (3) Dap Ba hte Masat (6) Dap Ba ginra ni hta gumshem Myen hpyen ni ding yang shamu shamawt chying lau hkawm nga ai majaw, KIA hte jahkring hkying gasat poi byin nga ai hpe mung chye lu ai.
