Gumshem Myen hpyen ni, Jet nbungli (3) hte Nam San Yang mare kaw bawm wa jahkrat
Ginjaw ginra, Nam San Yang mare kaw, July shata 21 ya shana hkying 10:28pm aten daram hta gumshem Myen hpyen ni, Jet fighter nbungli (3) hte bawm wa jahkrat bun ai lam chye lu ai.
Bawm jahkrat bun ai hta masha kaw hkra hkala ai lam nnga ai raitim, Nam San Yang mare uphkang rung nta hten nna, Nga Dumsu 3 si mat ai lam, buga masha ni kaw na chye lu ai.
Nam San Yang mare kaw gaw, hpyen nnga ai gasat poi byin ai lam nnga ai ndai zawn bawm jahkrat bun ai lam gaw, hpyen rip kawp hpe tawt lai ai sha n-ga mungshawa hpe masing nga nga hte gasat wa ai re lam, buga masha langai tsun ai.
Gumshem Myen hpyen dap hte KIA ni lai wa sai 2011 ning kaw nna numdaw mi bai gasat gala majan byin wa ai majaw, Nam San Yang mare masha ni gaw, Myen asuya uphkang ai myu mare kaba hte KIO asuya uphkang ai ginra de, hpyen koi yen machyu nga ai hpang, mare masha nkau gaw lai wa sai 2019 ning hta salang Hpaula Gam Hpang hte mare masha ni Myen asuya hte bawngban jahkrup nna bai wa nga hpang ai mare mung rai nga ai.
2023 ning July shata praw 3 ya shani kaw nna, gumshem Myen hpyen ni, hpyen n gun law law hte KIA ni nga ai shara de htu shadut tawt lai shang wa ai majaw, lahkawng maga gasat poi shani shagu ngu na byin nga ai re hpe mung chye lu ai.
Ya ten hta KIO/KIA ginjaw ginra de, gumshem Myen hpyen ni n-gun jat nga ding yang re majaw, lahkawng maga hpyen masa shaja hkat nga ding yang re lam, shawng lam na lit nga ai salang ni kaw na chye lu ai.
