Gumshem Myen hpyen ni, KIA Dap Dung (14) ginra hta nbungli, drone, laknak kaba ni hte gap bun
KIA Masat (2) Dap Ba, Masat (14) Dap Dung ginra, Noi Je Bum maga de gumshem Myen hpyen ni, December shata 13 ya jahpawt hkying 7:30am aten daram kaw nna, laknak kaba hte drone bawm ni gap gasat bun nga ai lam chye lu ai.
Tada-U kaw na rawt lung wa ai Jet fighter nbungli langai hte hkying 8:00am aten hta KIA Masat (14) Dap Dung ginra kaw bawm (2) wa jahkrat gasat ai raitim, masha hkra hkala ai gaw nnga ai lam, shawng lam na lit nga ai salang ni tsun ai kaw na chye lu ai.
Mogaung deng 8 mayan hkan shamu shamawt chyinglau hkawm ai, Sam Hkyeng (SNA) hpyen hpung ni mung, dai ginra na mungshawa ni a, dum nta chyinghka ni adup hpaw nna manu dan ai arung arai ni hpe shaw la nga ai sha n-ga, hpyen rang rut mung lahkawn nga ai lam, ginra masha ni kaw na chye lu ai.
Manmaw hpyen man shara de mung, shani shagu ngu na gasat poi byin nga ai rai nna, nbungli, drone, laknak kaba ni hte KIA pawng hpawm hpyen hpung ni nga ai shara de gap gasat bun nga ai lam, shawng lam hpyen shiga lawk kaw na chye lu ai.
