Gumshem Myen hpyen ni KIA ni nga ai shara de, Jet Fighter nbungli hte wa gap gasat
KIA Masat (2) Dap Ba, Masat (14) Dap Dung ginra, Wa Hka Maw post maga de, September shata 12 ya jahpawt hkying 10:10am aten hta Myitkyina kawn lung wa ai, gumshem Myen hpyen Jet Fighter nbungli hte numdaw 3 lang bawm wa jahkrat bun ai lam chye lu ai.
Jahtu Zup kaw dap jung nga ai, gumshem Myen hpyen dap Hk.L.Y (297) dap kaw nna mung, KIA ni nga ai Wa Hka Maw Post maga de, laknak kaba 120mm hte gap bun ai lam nga ai.
Gumshem Myen hpyen dap, Dapnu (88) hte Pyi Tu Tsit pawng hpawm hpyen hpung ni mung lagaw lam hku nna, Wa Hka Maw Post maga de htu shadut lung wa nga ai lam chye lu ai.
Lai wa sai June shata hta gumshem Myen hpyen dap ni shara jahkrat nga ai, Wa Sha Maw Post hpe KIA ni sa htim gap gasat zing da ai shara rai nna, gumshem Myen hpyen dap ni kalang bai Jet Fighter nbungli ni jai lang nhtawm bai htim gap gasat wa ai masa re lam, shawng lam na lit nga ai salang ni tsun ai kaw na chye lu ai.
Gumshem Myen hpyen dap gaw shi a lagaw lata tai ya ai, Pyi Tu Tsit ni hte pawng hpawm nhtawm KIA ni hpe htim gasat ai lam ni galaw nga ai lam, ginra shi sawk ni kaw na chye lu ai.
Ya aten hta Mungmyit Sinli Ga (Kachin Sub-state), KIA ni nga ai shara hte Jinghpaw Mung, KIA ni nga ai shara shagu ngu na de, hkarang lam, hka lam hku nna hpyen n gun laknak n gun ni htaw jahting bang nga ai majaw, gasat gala majan byin wa na hpe mungshawa ni myit tsang nga ai lam, buga masha ni tsun ai kaw na chye lu ai.
