Gumshem Myen hpyen ni KIA ni nga ai shara kaw nbungli bawm wa jahkrat gap bun
Gumshem Myen Hpyen Dap ni KIA nga ai shara hta May shata praw 1 ya shani Jet Fighter, Helicopter nbungli ni hte bawm wa jahkrat gap bun ai lam chye lu ai.
Ginjaw Ginra Ginwanga Ginjaw KIA Masat (5) Dap Ba ginra, Salawng Kawng (Tawer Shadaw) grup yin shara ni hta jahpawt hkying 10:00am aten kaw nna, shana maga hkying 4:50pm aten laman gumshem Myen hpyen ni kawn Jet Fighter langai hte numdaw (6) lang bawm wa jahkrat gap bun nna, Helicopter hte mung wa gap bun ai re.
Ndai Salawng Kawng grup yin shara ni hta gasat gala majan mung matut byin nga ding yang re lam, shawng lam shi shawk ni shana wa ai.
Shana hkying 7:00pm aten hta mung KIA Masat (5) Dap Ba, Masat (19) Dap Nawng Dap Dung, Lazau Bum grup yin kaw Jet Fighter langai hte bawm 4 lang wa jahkrat bun ai. Nmawk Alen Kawng kaw shra jahkrat nga ai Gumshem Myen Hpyen Dap, Hk.M.Y (437) dap ni kawn KIA ni nga ai shara de laknak kaba hte 13 lang gap bun ai lam chye lu ai.
April shata 28 hte 29 ya shani hta mung KIA Masat (2) Dap Ba, Masat (11) Dap Dung ginra hte KIA Masat (6) Dap Ba, Masat (36) Dap Dung ginra ni kaw Gumshem Myen hpyen hpung ni hte KIA ni gasat poi byin ai lam chye lu ai.
