Gumshem Myen hpyen ni, lai wa lai sa mungshawa masha ni hpe san jep ai lam galaw nga

Hpakant hte Danai lung wa ai lam mazup, Lawa Mare kaw du nga ai, gumshem Myen hpyen ni gaw, September shata 18 ya shani, lai wa lai sa mungshawa masha ni hpe san jep ai lam galaw nga ai hpe ginra masha ni kaw na chye lu ai.

Gumshem Myen hpyen dap, Dapnu (Tatma 88), Hk.L.Y (103) hte Hk.L.Y (142) dap na pawng hpawm hpyen n gun (90) jan rai nna, lai wa lai sa mungshawa masha ni hpe jahkring san jep ai lam galaw ai sha n ga, Lawa Mare masha ni hpe du hkra, lai wa lai sa pat hkum ai lam ginra masha ni tsun ai.

Ndai gumshem Myen hpyen hpung ni gaw, Jahtu Zup Pyi Tu Tsit ni hte pawng hpawm nhtawm, September shata 12 ya shani hta KIA Dap Dung (14) ginra, Wa Hka Padang Kawng Post hte Jahtu Zup Ninghtawn Rung ni hpe htu shadut htim gasat lung wa nna, bai nhtang yu wa ai hpyen hpung ni re lam sagawn chye lu ai.

Ndai shata hta sha, gumshem Myen hpyen la hte Balik ni pawng hpawm nhtawm, Myitkyina ginra rai nga ai, Pa La Na, Ubyit, Alam, Dumgan mare ni hta mung, shanhte ntsen nhten ai mungshawa ni hpe ding yang ngu na san jep nga ai lam na chye lu ai.