Gumshem Myen hpyen ni Laiza makau grup yin kaw nbungli bawm gap bun
KIO ginjaw ginra, Laiza Muklum makau grup yin shara hta November shata praw 1 ya shani, gumshem Myen hpyen ni Jet Fighter 3 hte bawm 4 wa jahkrat bun ai lam chye lu ai.
Dai ni shani ka-ang hkying 12:40pm aten hta Jet Fighter 1 hte bawm 2 wa jahkrat bun ai hpang, shana daw hkying 5:44pm aten hta Jet 2 hte bawm 2 bai wa jahkrat bun ai re.
Myitkyina maga de na rawt wa ai Jet Fighter mung, Mali Gang Dau Yang maga de numdaw masum lang bawm wa jahkrat bun ai, Hkatsu gumshem Myen hpyen dap kaw nna mung, Sama lam numshe maga de laknak kaba gap bun ai lam, shawng lam na lit nga ai salang ni kaw na chye lu ai.
October shata 31 ya shana daw hta mung, Laiza Muklum, Alen Bum mayan kaw Jet 3 hte bawm wa jahkrat bun ai hpang, hkying 7:15pm aten kaw nna, Hka Ya Bum, Bumre Bum kaw nga ai gumshem Myen hpyen ni, Laiza Muklum makau grup yin de laknak kaba 10 jan lang gap bun ai.
KIA Masat (9) Dap Ba, Masat (6) Dap Dung ginra hta shamu shamawt chyinglau hkawm ai gumshem Myen hpyen Moe Gaung kaw dap jung ai Hk.L.Y (74) dap na n-gun 50 daram hpyen hpung ni, KIA ni nga ai Jummaw lam de gale pru wa kaw gasat poi byin ai lam, shawng lam shiga lawk kaw na chye lu ai.
