Gumshem Myen hpyen ni laknak kaba hkrup mara gap bun ai majaw, mungshawa ni hprawng yen nga
Mungmyit Sinli Ga (Kachin Sub-State), KIA Masat (6) Dap Ba, Masat (36) Dap Dung ginra hta November shata praw 3 ya jahpawt hkying 5:00am aten daram kaw nna, Mungbaw Krung maga de gumshem Myen hpyen ni laknak kaba hte hkrup mara gap bun nga ai majaw, mungshawa nkau hprawng yen nga ai lam, ginra masha ni tsun ai.
“Dai hpawt hkying 4:20am aten daram hta Kokang MNDAA hpyen hpung ni Mai Hpang Myen hpyen dap kaw Drone hte bawm sa jahkrat bun ai lam na lu ai. Dai hpang hkying 5:00am aten daram kaw nna, Muse, Mile 105 kaw na mung Mungbaw Krung de laknak kaba 20 jan lang gap bang masai” nga nna, Mungbaw mare na mungshawa Hpawmi langai tsun ai.
Ya aten hprawng yen nga ai mungshawa mare kahtawng ni gaw, Mai Hpang mare, Hpalap mare hte Mungbaw gat pa hkan na mungshawa nkau mi gaw, tinang shim lum dum ai shara de gan hprawng koi yen nga ai. Dai ni gaw Mungbaw gat mung re, masha kadai nnga ai, gat seng mung yawng pat da ma ai nga nna, Hpawmi Jan. matut tsun ai.
November shata praw 2 ya shana maga hkying 2:30pm aten hta gumshem Myen hpyen dap ni Kutkai lawu Ga Leng mare gat makau kaw nbungli bawm jahkrat bun ai majaw, mungshawa amyu shayi asak 40 ning jan re langai asak si sum mat nna, dum nta nkau mung htenza mat ai lam, ginra shiga lawk kaw na chye lu ai.
Matut na Namhpakka mare kaw dap jung ai Hk.L.Y (123) gumshem Myen hpyen dap ni, Ri Yang mare maga de sinat kaba gap bun dat ai majaw, asak 60 ning re ai Jan. Hpauyam Lu Mai a lahtan kaw, pala hkyep wa hkra nna, dai shara kaw asak si sum mat ai lam, ginra masha ni tsun ai kaw na chye lu ai.
Ya aten hta Jinghpaw Mung, Mumyit Sinli Ga hte Sagaing ginra ni hta gumshem Myen hpyen dap hte hpyen masa shaja hkat nga dingyang rai nna, nkau shara ni hta shani shagu ngu na laja lana gasat poi byin nga ai re hpe mung chye lu ai.
