Gumshem Myen hpyen ni laknak kaba hkrup mara gap shadam ai majaw mungshawa ni si hkala hkrum
December shata praw 5 ya shana hkying 6:00pm aten daram hta Hpakant Tatma kawng kaw nna, gumshem Myen hpyen ni laknak kaba hkrum mara gap shadam ai majaw, mungshawa ni si hkala hkrum ai lam chye lu ai.
Hpakant Tatma kawng kaw nna, Marau Maw maga de laknak kaba hkrum mara gap bun ai majaw, mungshawa dinggai (1) si sum mat nhtawm marai (4) hkala hkrum ai lam, ginra masha ni tsun ai kaw na chye lu ai.
December shata praw 4 ya shana hkying 6:30pm aten daram hta mung, Hpakant ginra, Nyawng Pin Tar kawng hte Mawsiza Bunggyi jawng makau kaw KIA pawng hpawm hpyen hpung ni hte gumshem Myen hpyen ni ang katut gasat gala majan byin ai lam chye lu ai.
KIA Masat (9) Dap Ba Masat (6) Dap Dung ginra ni hta gumshem Myen hpyen dap, Pyi Tu Tsit hte Sam Hkyeng (SNA) pawng hpawm hpyen hpung ni shamu shamawt chyinglau hkawm ai majaw, KIA pawng hpawm hpyen hpung ni hte chyahkring hkring gasat gala majan byin ai re.
Manmaw hpyen man shara hta mung, December shata praw 4 hte praw 5 ya shani hta KIA pawng hpawm hpyen hpung ni hte gumshem Myen hpyen ni laja lana gasat majan matut byin nga ai rai nna, Waimaw Lamyang hpyen man shara de mung hpyen masa shaja hkat nga ding yang re lam, lit nga ai salang ni kaw na chye lu ai.
