Gumshem Myen hpyen ni mungshawa ni a manu dan ai arung arai ni hpe mya la kau

Mungmyit Sinli Ga (Kachin Sub-state), KIA Masat (6) Dap Ba, Masat (36) Dap Dung ginra hta shamu shamawt nga ai, gumshem Myen hpyen ni gaw January shata 24 ya shani Mungbaw Huchyi mare na mungshawa ni a dum nta na manu dan ai arung arai ni hpe mya la kau ya ai lam na chye lu ai.

Kokang MNDAA hpyen hpung ni, Huchyi mare kaw rawng ai lahkawng masum ya rai sai, mana de hkying 3:00pm aten hta Myen hpyen ni sa htim gap dat ai majaw gasat poi byin ai, mungshawa ni gaw Mungbaw RC nawku jawng de hprawng yen ai ni nga ai, nkau mi hpe gaw Myen ni rim woi da ai raitim bai dat ya sai lam, shawng lam na lit nga ai salang langai shana wa ai.

Myen hpyen ni gaw Tatma-99 kata na Hk.M.Y (420) dap hte Hk.L.Y (287) dap na hpyen hpung ni re. Huchyi mare na mungshawa ni a manu dan ai htunghking buhpun palawng hte soi nhpye, gumhpraw n-ga ni hpe la kau ya ai, Mandawng mare masha ni a Wa mung sat sha kau ya ai, Huchyi mare kaw nga ai Myen ni daihpawt bai pru mat wa masai, nga nna salang matut tsun ai.

Ya aten hta KIA Masat (36) Dap Dung ginra, Mungbaw krung shara ni hta gumshem Myen hpyen n-gun 400 daram shamu shamawt nga ai majaw aten ntam gasat gala majan naw byin wa mai ai lam, buga masha ni tsun ai kaw na chye lu ai.