Gumshem Myen hpyen ni nbung li, sinat kaba ni hte gap bun
KIA Masat (5) Dap Ba, Masat (18) Dap Dung ginra, Ja Pu ninghtawn Seng Mai mare kaw December shata 20 ya jahpawt hkying 6:00am aten daram hta gumshem Myen hpyen dap ni Jet nbung li (1) hte bawm wa jahkrat bun ai lam lit nga ai salang ni kaw na chye lu ai.
Seng Mai mare hpri nlung company makau kaw bawm wa jahkrat bun ai rai nna, shana maga hkying 1:50pm aten hta mung, Myitkyina maga kaw na rawt lung wa ai gumshem Myen hpyen dap a kyin yu Jet nbung li (1) Seng Mai mare Nmwi Zup mayan hkan wa pyen gawai hkawm nna bai nhtang mat ai lam chye lu ai.
Ya na zawn bawm wa shahkrat bun ai hta masha si sum hkala ai lam nnga nhtawm, ya ten sadi maja let nga taw ai lam shawng lam shi sawk ni kaw na chye lu ai.
Ndai zawn gasat gala majan ni byin nga ai sha n-ga, December shata 20 ya shani KIA Masat (2) Dap Ba, Masat (11) Dap Dung ginra rai nga ai, Myitkyina, Man Hkring lawk na sut du kaba Lagau Gum Se (Asak-57) ning hpe Man Hkring Bar, Arina KTV makau na shi mari da ai sun wang sa yu nga ai ten, damya ni nhtu hte du, baw, hkum hkan galun kahtam re majaw, dai shara kaw nan asak si sum mat ai lam chye lu ai.
KIA, KIO a ginjaw shara rai nga ai Laiza makau grup yin ni hta mung December shata 19 ya shani gumshem Myen hpyen dap kaw nna, sinat kaba hkrup mara gap shadam bun ai rai nna, KIA Masat 8 Dap Ba, Masat (5) Dap Dung ginra hta mung Mu Da Lay kawn Jet nbung li hte rawt lung wa ai, Hk.L.Y (10) dap na n-gun (50) daram hpe December shata 19 ya shani KIA ni Chyauk Ji kaw hkap gap ai hta gasat gala majan byin ai lam chye lu ai.
