Gumshem Myen hpyen ni nbungli bawm jahkrat bun ai majaw, mungshawa marai (20) daram si hkala hkrum
Sinna Ginwang Ginjaw, KIA Masat (2) Dap Ba, Masat (14) Dap Dung ginra kaw, January shata 11 ya shani hkying 11:40am aten hta Myen hpyen dap ni nbungli bawm wa jahkrat bun ai majaw, mungshawa ni marai (20) jan si hkala hkrum ai lam chye lu ai.
Dai ni hkying 11:00am aten daram hta Myen hpyen dap ni nbungli hte Tsan Lun Ja Maw kaw bawm wa jahkrat bun ai majaw, mungshawa ni marai (18) asak si sum mat nna, marai (10) hkala ai hte masha jahpan tup hkrak nchye lu shi ai lam, lit nga salang ngai tsun ai.
Gat seng yawng (9) hten za mat ai, nbungli gaw Ta Da U de na lung wa ai, bawm (2) wa jahkrat bun ai, ndai Ja Maw gaw mungshawa ni galaw lu/sha nga ai shara she re, gasat gala majan byin taw ai shara mung nre lam, salang wa matut tsun ai.
January shata praw 8 ya shana hkying 10:40pm aten daram hta mung, Hpakant KIA Masat (9) Dap Ba, Masat (6) Dap Dung ginra, Bum Nan gat len kaw gumshem Myen hpyen ni nbungli bawm wa jahkrat bun ai majaw, gat seng dum nta ni hten za mat ai sha n-ga, mungshawa hpawmi langai mung asak si sum mat ai re.
Ya aten Manmaw hpyen man de mung, KIA pawng hpawm hpyen hpung ni hte gumshem shem Myen hpyen dap ni shani shagu ngu na gasat poi byin nga ai hta gumshem Myen hpyen ni drone hte nbungli bawm ni jahkrat bun nga ding yang re lam, shawng lam na lit nga ai salang ni kaw na chye lu ai.
