Gumshem Myen hpyen ni nbungli drone ni hte KIA hpe gap gasat
KIA Masat 8 Dap Ba, Masat 5 Dap Dung ginra kaw March shata 31 ya shana maga hkying 5:05pm aten daram hta gumshem Myen hpyen ni nbungli bawm wa jahkrat gasat ai lam chye lu ai.
“Mana de hkying 5:05pm aten daram hta Dung 5 ginra, Gaugwi Hka makau kaw Myen hpyen ni nbungli bawm 2 wa jahkrat bun ai majaw, KIA hpyen la nkau asak si sum, hkala hkrum ai nga gaw tsun ma ai, marai kade re gaw tup hkrak n chye lu ai” nga nna ginra salang langai tsun dan ai.
Waimaw Lamyang maga de mung, April shata praw 1 ya jahpawt hkying 7:00am aten daram kaw nna, gumshem Myen hpyen ni drone hte bawm jahkrat gasat ai lam, ginra shiga lawk kaw na chye lu ai.
Manmaw hpyen man maga mung, gumshem Myen hpyen ni shani shagu ngu na nbungli drone ni hte gap gasat nga ding yang rai nna, hpyen masa mung shaja hkat nga ding yang re lam, shawng lam na lit nga ai salang ni kaw na chye lu ai.
