Gumshem Myen hpyen ni nbungli hte bawm wa jahkrat

KIA Masat (3) Dap Ba, Masat (12) Dap Dung ginra, Si Tar mare hte Si Tawng mare kaw April shata praw 8 ya shani gumshem Myen hpyen dap ni, Jet Fighter nbungli hte bawm wa jahkrat bun ai lam chye lu ai.

Dai pawt hkying 10:30am aten hta Si Tar mare kaw nbungli hte bawm lahkawng lang bat wa jahkrat bun kau da nhtawm, dai na maga hkying 2:00pm aten daram hta gaw, Si Tawng mare kaw numdaw 3 lang bat bawm wa jahkrat bun ai lam, shawng lam na lit nga ai salang ni tsun dan ai kaw na chye lu ai.

Man Hka hte Man Na mare grup yin shara ni hta mung, KIA, KPDF pawng hpawm hpyen hpung ni hte gumshem Myen hpyen dap ni laknak kaba hte gap bun hkat nga ai sha n ga, hpyen masa grai naw shaja hkat nga ai lam chye lu ai.

KIA Masat (12) Dap Dung ginra de, gumshem Myen hpyen ni hpyen n gun tsa kahtap hte shamu shamawt chyinglau shang wa ai majaw, March shata 23 ya shani kaw nna, shani shagu ngu na gasat poi byin nga ai re hpe mung chye lu ai.