Gumshem Myen hpyen ni sinat kaba hkrup mara gap shadam nga ai majaw, mungshawa ni hkrit tsang
KIA Masat (9) Dap Ba, Masat (44) Dap Dung ginra, Sa Maw makau kaw dap jung nga ai, gumshem Myen hpyen dap Hk.M.Y (383) hte (384) dap ni gaw, April shata 18 ya shana hkying 9 jan daram aten hta sinat kaba majoi gap shadam nga ai majaw, mare masha ni hkrit tsang nga ai lam chye lu ai.
Dai gumshem Myen hpyen dap hpe lai wa sai 2021 ning htum wa maga de, KIA hpyen hpung ni sa htim gap gasat ai hpang, mare makau grup yin hte KIA ni nga ai ngu ntsen nhten ai Marau bum maga de aten ntam hkrup mara, sinat kaba gap shadam bun nga ai lam chye lu ai.
Ya na zawn sinat kaba hkrup mara gap shadam bun nga ai majaw, mungshawa masha ni hta hkra machyi hkrum wa na hpe ginra masha ni hkrit tsang nga ai rai nna, dai Myen hpyen dap shawng hku nna, shana aten hkan lai wa lai sa galaw nga ai mungmasha ni a modo cycle ni hpe sinat hte hkan gap ai lam ni mung galaw nga ai lam, ginra masha ni kaw na chye lu ai.
Mungmyit Sinli Ga (Kachin sub-state), KIA Masat (6) Dap Ba, Masat (36) Dap Dung ginra ni hta mung, ndai laman gumshem Myen hpyen dap, Dapnu 77 hte 99 dap na hpyen hpung ni KIA ni nga ai shara makau hkan du hkra, shamu shamawt chying lau hkawm nga ai majaw, gasat gala majan byin wa mai ai lam, shawng lam hpyen shi sawk ni kaw na chye lu ai.
