Gumshen Myen hpyen dap ni gap dat ai pala hkyep hkra nna mungshawa marai (3) hkala hkrum
Danai Lido lam, Dumbung kaw dap jung nga ai gumshem Myen hpyen Hk.L.Y (86) dap ni December shata (10) ya shani hkying 11:30am aten, Dumbung Na Jat Pa kawn Hkrinru Pa maga de sinat laknak hkrup mara gap bun ai majaw, mungshawa marai (3) hkala hkrum ai lam chye lu ai.
Gumshem Myen hpyen dap ni gap dat ai 60mm ngu maram lu ai sinat kaba si 2 Hkrinru Pa kaw na Lwi Dwi Sun langai kaw wa hkrat kapaw ai majaw, sun sin ai Jan. Nhkum Hka Tawm asak (55) ning a magyi kaw hkra ai, Nba Ban Htoi Awng asak (3) ning gaw du kaw hkra ai rai nna, namsi sa mari ai Aye Khaing asak 29 ning gaw baw kaw hkra hkala ai re lam, ginra masha ni tsun shana wa ai.
Hkala hkrum ai ni hta ningma grai sawng ai lam nnga ai majaw, tinang a dum nta kaw sha tsi tsi hkamla nga ai lam, ginra masha ni tsun ai kaw na chye lu ai.
Gumshem Myen hpyen dap ni gaw, ya na zawn mungshawa ni nga ai grup yin de sinat kaba hte hkrup mara gap shadam bun ai majaw, mung mare masha ni si hkala hkrum ai sha n ga, dum nta ni htenza mat ai lam jahkring hkring byin ai re hpe chye lu ai.
Mungmyit Sinli Ga (Kachin Sub-state), KIA Masat (6) Dap Ba, Masat (36) Dap Dung ginra hta mung, December shata 10 ya jahpawt hkying 7:30am aten hta, kadai wuhpung ni gap dat ai re atsawm nchye lu ai sinat kaba si 4, 5 daram gaw, Hpawng Seng mare Jinghpaw daw hte Miwa daw kaw wa hkrat kapaw ai majaw, mungshawa marai 1 asak si sum nna, marai 2 hkala hkrum ai lam, shawng lam na lit nga ai salang langai tsun dan ai.
Asak si sum mat ai wa gaw, Miwa daw na Salang Yi Ming Gang asak 60 ning gaw hkum ting pala hkyep hkra nna nnga mat ai, kashu Shayi Yi Shun Mi asak 15 ning gaw sinda kaw hkra hkala ai rai nna, Jinghpaw daw na Salang Hpukjawng Hkawng Hawng asak 40 ning daram re wa gaw, shingma de hkra hkala ai re lam, salang wa tsun ai.
Salang Hpukjawng Hkawng Hawng gaw, Muse tsi rung de sa tsi na rai nna, Shayi Yi Shun Mi gaw, Hpawng Seng tsi rung kaw sha tsi tsi hkamla nga ai lam, salang wa matut tsun ai.
December shata 10 ya dai hpawt hkying 5:45am aten kaw nna dai na maga hkying 3:00pm aten daram du hkra, KIA Masat (36) ginra, Man Yang hte Sin Sai Htang mare makau shara lahkawng kaw, gumshem Myen hpyen hpung ni hte Kokang MNDAA ni laja lana gasat poi byin ai lam na chye lu ai.
