Gwi Hka kaw Ya Ma tawng 6200 hte rau gumhpraw sen manga shi kru lu rim

Hpakant, Gwi Hka buga pat jasan hpung ni kaw nna Gwi Hka mare lawk (5) kaw shanu nga ai U Zaw Lat hte Daw Chaw Su Hlaing yan a nta kaw ntsen nhten ai majaw san jep yu ai shaloi Ya Ma tawng 6200 hte myen gumhpraw lap sen manga shi kru ( 5,600,000 kyats) lu rim da ai lam buga pat jasan hpung ni shana wa ai kaw na chye lu ai.

“Ndai yan la gaw Gwi Hka kaw nga ai mung na sai. Lai wa sai 3 ning daram hta mung shan hpe anhte buga pat jasan hpung ni kaw nna gaw hkum galaw sa, bai galaw jang nang hkrup sha na re ngu nna shadum jahprang da ai lam, ga sadi lak mak htu da ai lam ni nga ai re. Shi gaw buga pat jasan ni sadi jaw da ai masha mung re” nga nna buga pat jasan amu madu Salang Nhkum Tang Gun tsun ai.

August shata praw 3 ya shana hkying 9:30pm aten hta lu rim ai rai nhtawm dai shana jang hkying 12:30pm aten hta shan hte rau Ya Ma tawng 6200 hte  gumhpraw lap sen manga shi kru hpe Hpakant မူးယစ္ dap de shalai kau ai lam chye lu ai.

Ya aten du hkra rai yang ndai yan  hpe gara hku je yang nna kaning re dam ni jahkrat sa wa na hpe gaw nchye lu shi ai re.

Shan gaw namhpam dut lu dut sha ai lam hpe galaw ai na sai rai nna buga pat jasan hpung ni kaw nna mung sadi jaw nga dingyang re. Dai hta  matut galaw ding yang re ai majaw buga pat jasan hpung ni kawn san jep nna rim da ai re.

Gwi Hka buga pat jasan hpung ni gaw shawoi aten ni hta nam hpam lu sha hte seng nna shamu shamawt ai lam, rim jep ai lam ni law law galaw nga ding yang re hte nlaw nla sha lu rim ai ni hpe gaw tinang buga kata hta sha je yang ya ai raitim ya ndai kalang gaw lu rim da ai arai hte gumhpraw mung law ai majaw Hpakant မူးယစ္ dap de shalai kau ai re hpe mung chye lu ai.