Gwi Hka Maw ga gyi ai kaw kaput lawm mat ai masha ni hpe naw matut tam nga

Hpakant, Gwi Hka Maw ga gyi ai hta July shata 3 ya shani du hkra moimang 172 lu shaw da sai hte hkala hkrum ai masha jahpan yawng marai 56 re lam na chye lu ai.

Naw kaput ngam nga ai moimang ni hpe lamu marang masa hta hkan nna matut manoi naw tam nga ding yang re hte hkala hkrum ai masha ni gaw Hpakant Mungshawa Tsi Rung hte Myitkyina Mungshawa Tsi Rung kaw tsi tsi hkamla nga ai lam chye lu ai.

Shaw la lu ai moimang 100 jan hpe Gwi Hka Myen Amyusha lup ding lup wa kaw tawn da ai rai nna, Wunpawng ni a moimang hpe gaw July shata praw 3 ya shani makoi mayang kau sai hte Myen, Sam ni a moimang ni hpe gaw makoi mayang ai lam n galaw shi ai nga nna, Gwi Hka Ginra Pat Jasan Amu Madu Salang Nhkum Tang Gun tsun dan ai kaw na chye lu ai.

Hpakant, Gwi Hka Maw hta July shata praw 3 ya shani Jinghpaw Mungdaw Asuya Hkringmang Salang ni, ေျမာက္ပိုင္းတိုင္း တိုင္းမႈး hte shingra nhprang sut rai Hkringmang Salang Dashi La Seng ni sa du let ga gyi ai kaw asak si sum mat ai masha ni a ngam nga ai dum nta masha ni hte hkala hkrum ai masha ni hpe garum madi shadaw ya na matu zuphpawng galaw ai lam, Wunpawng Amyusha Zinlum Hpung Amu Madu Salang Dashi Naw Lawn tsun dan ai.

“Shingra nhprang sut rai Hkringmang Salang Dashi La Seng kaw nna zuphpawng woi galaw nhtawm, Asuya ni hku nna sen 500 shaw, ေက်ာက္မ်က္လုပ္ငန္းရွင္ kaw nna  sen 500, lauban langai gaw sen latsa rai nna, asak si sum ai ngam nga ai dum nta masha ni hte hkala hkrum ai ni hpe garum na matu alu mahkawng taw nga ma ai re” nga nna tsun ai.

Hpakant ginra kaw ga gyi kaput nna asak si sum shadang law ai gaw, ndai kalang sawng dik htum re lam, ginra masha ni tsun da ai kaw na chye lu ai.

Wunpawng Mungdan Shanglawt Asuya kaw nna mung, asak si sum mat ai ni hte hkala hkrum nna tsi tsi gawn lajang hkamla nga ai ni hte rau myit npyaw machyi hkam sha lawm ai lam ndau laika shapraw da ai hpe mu chye lu ai.

Photo Crd; Fb