Gwi Hka Maw, ga shingbut gyi ai majaw lung seng tam masha 200 daram kaput lawm mat
Hpakant, Gwi Hka Maw kaw July shata praw 2 ya jahpawt hkying 8:00am aten daram hta Lagu Jawng maga na ga shingbut gyi hkrat wa ai majaw, ye mase nlung tam ai masha ni marai 200 daram kaput lawm mat ai hta, asak si sum ai marai 130 hte hkala hkrum ai masha marai 20 jan hpe lu shaw la sai lam, buga masha ni tsun shana wa ai kaw na chye lu ai.
Hkala hkrum ai masha marai 20 jan gaw ya aten Hpakant Mung Shawa tsi rung kaw tsi gawn lajang nga ai rai nna, Wunpawng amyusha marai 9 kaput lawm mat ai hta marai 6 hpe mu shaw la sai lam, naw kaput ngam nga ai masha ni hpe Gwi Hka mare masha ni hte Gwi Hka Pat Jasan Hpung ni, Shinggyim Nauna Garum Ningtum Hpung ni, Wan Sat Dap ni, hte, Myen Asuya Balik Dap ni shang lawm nna matut tam nga ding yang re lam, Gwi Hka Buga Pat Jasan Amu Madu Salang Nhkum Tang Gun tsun dan ai.
“Wa ni madu ai ဧရာရတနာ Company hte သစ္သံုးလံုး Company ni gaw July shata praw 1 ya shani kaw nna jak ni yawng dawm jahkring kau sai re majaw, July shata praw 2 ya jahpawt lung seng (ye mase) tam masha ni lung seng htu ye mase tam nga ai ten, Company ni jahkring da ai hka nawng de Lagu Jawng maga na ga n-gam gyi hkrat wa ai majaw, lung seng nhkun hka nawng tsaw lung wa nna, makau n-gam hkan lung seng tam htu nga ai masha ni hpe hka wa gang jahkrat nna si lawm mat ai law ai hku re” nga nna Hpakant, Wunpawng Amyusha Zinlum Hpung Amu Madu Salang Dashi Naw Lawn tsun dan ai.
Hpakant Maw ginra gaw daining grai sadi maja ra ai shaning re, lamu marang mung law ai sha n-ga, Company ni htu da ai lung seng nhkun ni mung n-gam ni grai law ai majaw, ga shingbut ni gyi wa mai ai re, laklai lam law law lang byin mai ai re majaw grau sadi maja ra na lam, Salang shi a ningmu hpe matut tsun dan ai.
Hpakant, Gwi Hka Maw hta laiwa sai 2015 ning kaw nna ya dai ni du hkra rai yang, ya na zawn ga shingbut gyi nna masha tsa lam si ai gaw ndai lang hte rai yang, 3 lang du sai re lam chye lu ai.
