Gwi Htau mare kaw gasat gala majan byin
KIA Masat (1) Dap Ba, Masat (4) Dap Dung ginra Gwi Htau mare kaw gasat gala majan byin ai lam chye lu ai.
April shata 28 ya jahpawt hkying 9:30am aten daram kaw nna, Gwi Htau mare grup yin kaw KIA pawng hpawm hpyen hpung ni hte gumshem Myen hpyen dap ni gasat gala majan byin nga ai lam, lit nga ai salang ni kaw na chye lu ai.
Gasat gala majan byin ai hta Tang Hpre mare kaw dap jung nga ai, gumshem Myen hpyen Hk.L.Y (29) dap hte (105) dap kawn laknak kaba, drone ni hte gap garum ya ai lam ni galaw nga ai hpe chye lu ai.
Gumshem Myen hpyen dap ni gaw April shata 27 ya shani kaw nna, hpyen shamu shamawt n-gun htu shadut wa ai majaw, gasat gala majan byin ai rai nna, ya aten lahkawng maga hpyen masa shaja hkat nga ai lam chye lu ai.
Matut nna Hpakant lam hte Manmaw gingra ni hta mung, KIA pawng hpawm hpyen hpung ni hte gumshem Myen hpyen dap ni gasat gala majan matut byin nga ai lam chye lu ai.
