Gwi Htu Pyithusit ningbaw La Sang Awng Wa a ahkang hte Loibau Bum kaw ja htu sha nga
Mali Nmai Hka madim a majaw htawt sit da ai Mali Yang mare kaw nna mile 2 dang tsan ai shara Loibau Bum kaw laiwa sai February shata 20 ya jan kaw nna ja htu chyam dinglik yu ai lam ni hpe galaw dingyang rai nga ai lam chye lu ai.
Ndai ja htu ai lam hte seng nna Mali Yang mare salang wa tsun ai hta “Loibau Bum kaw ja htu ai ni gaw Company hku nre ai sha Gwi Htu Pyithusit ningbaw Lasang Awng Wa ahkaw ahkang jaw ai hte ja htu nga ai re. Mare uphkang rung kaw ja htu bungli galaw nga ai marai 12 a yup tung jahpan hpe sa bang ai shaloi she dai shara kaw ja htu nga ai lam chye ai.”
“ Anhte mare kaw na gaw ahkaw ahkang jaw ai lam ni nnga ai, shangun ai lam ni nnga ai, shanhte kaja wa galaw sa wa na rai yang gaw anhte mare ni hte hkrum bawng ban ai lam ni nga ra na re ngu sawn lu ai. Asuya lahkawng maga de mung tsun jahkrup ra na re ngu tsun yang Lasang Awng Wa a ahkaw ahkang hte shang chyam ai re lam tsun ai” nga nna Mali Yang mare na Salang langai tsun dan ai.
“ Kadai salang wuhpung wuhpawng mi sa galaw ai raitim, kadai lauban, kadai Company mi sa galaw ai raitim, anhte Maliyang mare a matu akyu nrawng ai rai yang gaw nmai hkap la na re, akyu rawng ai rai yang gaw kadai hpe raitim anhte gaw hkap la na re” nga nna Salang wa matut tsun dan ai.
Mali Yang mare a sinpraw maga nga ai Loibau Bum ntsa kaw, laiwa sai 2016 ning hta Mali Nmai Hka madim galaw hpang sa wa ai aten, china power investment ( CPI ) ni kawn galaw tawn da ai lungpu masum nga nhtawm dai shara kaw na lungsha ni hpe ja lu shale hkra lang hte lang galaw chyam dinglik taw ai re lam chye lu ai.
Mali yang mare gaw Mali Nmai Hka madim a majaw htawt sit da hkrum ai mare rai nna htinggaw 140 jan nga nhtawm Lasang Awng Wa a Pyithusit ginra ni hta na mare langai re ai lam chye lu ai.
