Hk.L.Y ( 297 ) dap ni shapraw da ai ndau laika hpe bai dawm la
Sinna Ginwang Ginjaw, KIA Dap Ba ( 2 ) Dap Dung ( 14 ) ginra, Jahtu Zup kaw dap jung ai, Myen hpyen dap Hk.L.Y ( 297 ) ni kawn June 22 ya shani ndau shabra laika shapraw dat ai raitim, shani hkying 12:45pm aten daram hta gaw, ndau laika pa hpe dawm la na matu, Hk.L.Y ( 297 ) dap na dap reng Captain Ney Win Aung kawn mare salang ni hpe phone hte bai set shana ai lam, buga masha ni kawn chye lu ai.
Ndau laika pa bai dawm la ai hte seng nna, dai buga na salang ni tsun ai gaw,“Shanhte dai laika shabra ai hte Hpakant Myoney maga na mung, shara shagu hkan na yawng yawng grai garu wa ai majaw hkrit di dawm kau ai rai na masa nga ai” nga nna tsun maram ma ai.
Dai ndau laika pa hta tinang uphkang nga ai ginra, Nawngme mare, Wa Ra Zup mare, Jahtu Zup mare hte Tingkawk mare grup yin hta Myen hpyen dap kaw na Lidu lam pai, hkra Meters ( 5000 ) grup yin jasan jaseng gap jasan ai lam galaw na re majaw, buga mungmasha ni hpe June 23 ya shani kaw nna July praw 2 ya laman, nam de tamlu tamsha, yi sun hkauna nsa galaw na matu hte, shana da ai kata kaw byin hkrum machyi wa ai manghkang ni gaw, mare uphkang salang ni lit la ra na re nga nna ndau laika pa hta ka da ai hpe mu chye lu ai.
