Hk.M.Y (601) gumshem Myen hpyen ni sinat kaji kaba majoi gap shangoi ai majaw, mungshawa ni hkrit tsang nga
Manmaw, Manje kaw dap jung nga ai Hk.M.Y (601) gumshem Myen hpyen ni, March shata 30 ya shana daw hkying 3:45pm aten hta dap kata sinat kaji kaba majoi gap shangoi ai majaw, Manje mungshawa masha ni hkrit tsang nga ai lam, buga masha ni kaw na chye lu ai.
“Ya shanhte bum de na hprawng hkrat wa ai hpyen n-gun loi bai nga nna, sinpraw maga de gaw, Manje mare kata kaw bang da ma ai, Dingda maga gaw, Madu Bum kaw tawn da nga ma ai, Sinna maga gaw, Maw Seng Bum de bai tawn mayu sam ma ai, sinat kaba gaw dai maga de gap bun nga ma ai” nga nna ginra salang langai tsun ai.
KIO ginjaw ginra Manmaw, Myitkyina modo lam mayan hte KIA Masat (3) Dap Ba ginra ni hta dap jung nga ai gumshem Myen hpyen dap hpe KIA pawng hpawm hpyen hpung ni laja lana htim gasat zing wa ai majaw, gumshem Myen hpyen ni Manmaw, Manje de hprawng htingnut yu mat wa ai hta ya aten hpyen n-gun tsa kahtap du nga ai lam na chye lu ai.
March shata 29 ya shani hta mung, Myothit Kunglaw makau Man Nawng gumshem Myen hpyen dap hpe KIA pawng hpawm hpyen hpung ni htim gasat ai hta gumshem Myen hpyen dap ni, Jet nbungli hte Y-8, Y-12 nbungli kaw nna, bawm wa jahkrat gasat bun ai lam chye lu ai.
