Hka Garan makau kaw KIA hte gumshem Myen hpyen ni gasat gala majan byin
KIA Masat (1) Dap Ba, Masat (10) Dap Dung ginra, Hka Garan makau kaw June shata 12 ya laban jahpawt hkying 6:00am aten daram hta gumshem Myen hpyen ni hte KIA ni gasat gala majan byin ai lam chye lu ai.
Gumshem Myen hpyen hpung ni, Hka Garan kaw nna Myitkyina modo lam hku yu wa ai ten, KIA ni hkap shingla gasat dat ai kawn gasat poi byin ai re lam, ginra shi sawk ni kaw nna chye lu ai.
June shata 10 ya shani hta mung, KIA Masat (1) Dap Ba, Masat (10) Dap Dung ginra, Sumpra Bum maga na shamu shamawt yu wa ai, gumshem Myen hpyen dap hte Pyi Tu Tsit pawng hpawm hpyen hpung ni hpe, Zanan Hka mahkrai pawt kaw KIA ni hkap shingla gasat dat ai kawn gasat poi byin ai lam nga ai.
Ya aten hta gumshem Myen hpyen dap ni, KIA Masat (1) Dap Ba hte Masat (2) Dap Ba ginra ni hta hpyen shamu shamawt lam ding yang galaw nga ai majaw shani shagu ngu na gasat gala majan bai byin nga ai re hpe mung chye lu ai.
