Hka Hpawk camp kaw nbungli bawm wa jahkrat bun

KIA Masat (3) Dap Ba ginra, Nba Pa Ginwang daw Ding Sing Pa Ninghtawn, Hka Hpawk camp kaw gumshem Myen hpyen dap ni nbungli bawm wa jahkrat bun ai lam chye lu ai.

January shata 18 ya shana yup tung hkying 11:40am aten daram hta Hka Hpawk camp kaw gumshem Myen hpyen dap ni Jet nbungli hte bawm wa jahkrat bun ai lam, ginra masha langai tsun ai.

Nbungli bawm wa jahkrat bun ai hta Hka Hpawk camp shat gawk langai kaw wa hkrat kapaw ai majaw, masha langai hkra hkala ai lam chye lu ai.

Matut nna Manmaw ginra hta mung, KIA pawng hpawm hpyen hpung ni hte gumshem Myen hpyen dap ni shani shagu ngu na gasat gala majan laja lana matut byin nga ai rai nna, Waimaw ginra hta mung gumshem Myen hpyen dap ni hpyen shamu shamawt htu shadut nga ai lam chye lu ai.