Hka Lawng Kawng Myen dap hpe KIA ni zing madu la
KIA Masat (2) Dap Ba, Masat (14) Dap Dung ginra, Hka Lawng Kawng gumshem Myen hpyen dap hpe KIA ni zing madu la lu ai lam chye lu ai.
June shata 10 ya shana maga hkying 2:40pm aten daram hta gumshem Myen hpyen Hk.L.Y (297, 260) dap kata na hpyen hpung ni dap jung shara la nga ai, Pat Maw Hka Lawng Kawng Myen dap hpe KIA pawng hpawm hpyen hpung ni padang dip la lu ai re lam, lit nga ai salang ni kaw na chye lu ai.
Pat Maw Hka Lawng Kawng hpyen dap hpe lai wa sai 2017, 2018 ning laman hta gumshem Myen hpyen dap ni dap jung shara jahkrat wa ai rai nna, makau grup ying maw ginra ni hta shagyip shagyeng gumhpraw hta sha nga ai dap re hpe mung chye lu ai.
Matut nna Waimaw Ginwang Hkanan Buga Lamyang hpung lawk nawku jawng kaw dai na maga hkying 3:30pm aten daram hta gumshem Myen hpyen dap ni Drone bawm wa jahkrat bun ai majaw, nawku jawng hten za mat ai lam chye lu ai.
Ya aten Waimaw, Nmawk hte Manje ginra ni hta KIA hte gumshem Myen hpyen dap lapran hpyen masa shaja hkat nga ding yang rai nna, gasat gala majan mung matut byin nga ai re.
