Hka mawru a majaw mungshawa marai 6 asak si sum nna, nta htinggaw 34 hka kaw yawng lawm mat
Marang htu sawng nna hka mawru wa ai majaw, mungshawa marai 6 asak si sum nna, nta htinggaw 34 hka kaw yawng lawm mat ai lam chye lu ai.
August shata praw 3 ya shana marang htu sawng nna hka mawru wa ai a majaw, Mung Seng Yang Golf pa na mungshawa marai (3) hte Hpung Lum Yang (Sut Hpawm Ginra) kaw na mungshawa marai (3) asak si sum mat nhtawm, Ja Htu Kawng, Je Yang hpyen yen dabang kaw na dum nta 34, hka kaw yawng lawm mat ai lam, komiti salang ni tsun ai.
Asak si sum mat ai mungshawa ni hpe gaw, seng ang ai komiti hte nta masha ni kawn, makoi mayang ai lam galaw ya sai raitim, hka hpyen a majaw nta nawng yawng lawm mat ai htinggaw ni hte hkumpup zai bru hkrai chyat mat nna nmai nga mat ai nta htinggaw mungshawa ni gaw, ya aten yakhkak hkrum nga ai re.
Nta nawng yawng lawm mat ai htinggaw ni gaw, Ja Htu Kawng mare kaw na nta (5), Je Yang hpyen yen dabang lawk (1) kaw na nta (5), Je Yang lawk 8 (Hpung Mai Yang) kaw na nta (12) hte Je Yang lawk 9 (Sut Mai Yang) kaw na nta (12) gaw, hka kaw yawng lawm mat ai lam, lawk komiti salang ni matut tsun ai.
Nta nawng yawng lawm mat ai mungshawa ni hte hkum pup zai bru hkrai hpring mat nna nmai nga mat ai mungshawa ni gaw ya aten, tinang na lawk kata hte jinghku ni hkan byin mai ai hku shanu machyu nga ai hta arung arai yawng hpa mung nlu la ai sha n-ga, hkum lawt daw sha hprawng pru wa ai majaw, malu masha, lu hka, bu hpun palawng, hpung nba lam amyu myu hta yakhkak hkrum nga ai lam chye lu ai.
Ya aten hka mawru a majaw lam, mahkrai ni htenza nga ai hta mungshawa ni hkawm sa hkawm wa yakhkak nga ai sha n-ga, mungshaw ni a sut gan law law mung, hka mawru a majaw hten za sum machyi nga ai re.
