Hkai Rem hpaji sharin jawng yu hpawng galaw
Wunpawng Mungdan Shanglawt Asuya, Ginjaw Hkai Rem Magam Dap kaw nna hpaw sharin ya ai masat yan (7) lahta tsang hkai rem (Diploma) hte masat yan (18) ningpawt ninghpang hkai rem jawng yu shagrau hpawng hpe March shata 31 ya jahpawt hkying 9:00am aten hta, Laiza Muklum Hkai Rem Magam Dap, Hkru Kat Gawk Nu kaw galaw la lu sai.
Daini jawng yu lakmat shagrau hkam la sai sara/num ni gaw, lahta tsang hkai rem (Diploma) jawng yu ai marai 11 hte ningpawt ninghpang hkai rem jawng yu ai marai 10 yawng marai 21 re.
Hpawng hta Hkai Rem Jawng woi awn komiti Ningbaw Du Kaba Sumlut Gun Maw (KIC Ningbaw Malai (I)) kaw nna hpaji jaw shatsam mungga shaga ai.
Hkai Rem Jawng Up Sara Kaba Kareng Brang Seng (Hkai Rem Magam Dap Lithkam) kaw nna mung jawng yu shatsam mungga shaga ai hte jawng yu lakmat shagrau ya ai re.
Jawng hpe June shata kaw nna March shata du hkra shata (10) hpaw sharin ai rai nna, Hkai Rem hpaji hpan (10), madi shadaw laika, ga hpan (4), Ninggawn Mungmasa hte Rawt Malan labau ni hpe sharin achyin ya ai lam chye lu ai.
Ningpawt ninghpang hkai rem hpaji ningtawn ai ni hpe lahta tsang hkai rem hpaji matut lung lu na ahkang jaw ai hte lahta tsang hkai rem hpaji ningtawn ai ni hpe gaw Hkai Rem Dakkasu matut lung na matu hkyen lajang ya na re lam chye lu ai.
Shagrau hpawng hta, Du Kaba Sumlut Gun Maw (KIC Ningbaw Malai (I)), Du Kaba Zawngbuk Htan (KIC Ningbaw Malai (II)), Salang Kaba Labang Doi Pyi Sa (Ningtau Ninggawn Amu Madu) hte rau Magam Dap, Makan Dap shagu na magam gun ni, makam masham hpung shagu na nawku hpung woi sara ni hte jawngma kanu kawa ni sa du shanglawm ai re.
Hkai Rem Jawng hpe laiwa sai 1997 ning, Mai Ja Yang, Wun Gau Bum kaw shawng nnan hpaw hpang wa ai kaw na dai ning du hkra rai yang, jawng yu sai sara/num ni yawng marai 335 tup du sai re lam chye lu ai.
