Hkam bawm kabye kapaw la nna marai 1 si, marai 1 hkala hkrum
Hpakant sa lam Kamai gaiwang kata, မအူပင္ ေရကာတာ shing du Bum Rawng Pa kaw mung mare masha 2 hkam bawm kabye kapaw la ai majaw, marai 1 asak si sum mat nna, marai 1 hkala hkrum ai lam, buga masha ni tsun ai kaw na chye lu ai.
Hkam bawm kabye la hkrum ai ni gaw, kanu Jan. Lar Mi Hu (asak 74 ning) hte kasha Jan. Ah Sar Mee (asak 45 ning, kasha marai 3 a kanu) yan gaw, March shata 22 ya shani hkauna pa kaw na chyinghkrang sun de sa wa ai ten lam kaw hkying 2:00pm aten hta, hkam bawm kabye kapaw la ai re lam, buga na salang langai tsun ai.
Kanu rai nga ai Jan. Lar Mi Hu gaw shi hkrai gum rawt pru wa nna Bum Rawng Pa maga de wan n-ga ju nga ai ni hpe wa lu marawn garum hpyi ai majaw sa lu hkye la ai lam, hkala sawng ai majaw, Myitkyina M.P.Hk Hpyen Tsi Rung kaw tsi tsi hkamla nga ai, ya aten mai tsai wa sai lam, salang wa matut tsun ai.
Kasha rai nga ai Jan. Ah Sar Mi gaw asak si sum mat sai rai nna, shi a moimang hpe gaw, March shata 23 ya shani hkying 11:00am aten hta sa mu tam la ai lam chye lu ai.
KIA hte Myen Hpyen Dap lahkawng maga kaw nna, mung mare masha ni hpe nam de pru hkawm sa ai lam sadi na matu tsun da ai raitim, kan bau bungli a majaw ya na zawn byin hkrum ai rai nna, mung mare masha ni yawng mung ahkying aten masa hpe yu nna sadi sahka let hkawm sa nga ra ai lam, salang wa matut tsun ai.
Laiwa sai ten hta gaw, ya na zawn hkam bawm kabye kapaw la nna masha asak si sum, hkala nba ai lam nbyin ga ai rai nna, ndai hkam bawm mung, kadai gara wuhpung ni hkam tawn ai re nchye lu ai re hte ya aten laman dai shara grup yin hkan Myen Hpyen Dap hte KIA ni lahkawng maga shamu shamawt shamawt nga ai ginra re lam chye lu ai.
